** నీకెందుకులే ... !! **

ఎంత అమాయకంగా 
చెప్పి వెళ్లిపోయావు 
పరుషంగా మాట్లాడానే తప్పా 
నీ ప్రాణమేమి తీయలేదుగా అని ..

ప్రాణాలు పోయి ఉంటే 
ఆ బాధ అనిపించేది కొన్ని క్షణాలే ... 
ఇప్పుడు క్షణక్షణం పడ్తున్న బాధ 
నీకెలా చెప్పనూ ..

ఇప్పటికీ నా అలవాట్లలో 
మార్పెందుకు రాదో అర్థమే కాదు
రావని తెలిసి కూడా 
నిరీక్షిస్తూనే ఉంటాను

నువ్వు రావద్దనే కోరిక కూడా ..దేనికంటే 
సానుభూతితో నువ్వు 
చూపించే నీడకన్నా 
ఇప్పుడున్న ఎండే 
ఎక్కువ సౌఖ్యాన్ని ఇస్తుంది

విలువలేని చోట విడిదెందుకనీ 
అనుకోను ఇష్టపడేవారిని కాదు 
ద్వేషించే వారిని ఇష్టపడటమే 
నా ఇష్టానికి నేను ఇచ్చే విలువ ..

ఒక నిర్జీవమైన భావానికే 
ఇంత విలువ ఇచ్చే నేను 
నన్నింకా సజీవంగా ఉంచే 
నీకెంత విలువ ఇస్తానో ...తెలుసా

ఇవన్ని నీకు విసుగునిస్తాయేమో 
నీకే ఏమిటి నా హృదయం కూడా 
విసుగ్గా ప్రశ్నిస్తుంది .. ఎందుకీ ఉదాసీనత ?
ఎలా చెప్పనూ ....మీకు 
మందహసించడానికి ఏ ఒక్క కారణం మిగలలేదని ....

Posted by : mehdi ali 9:41 AM

Subscribe by Email

Follow Updates Articles from This Blog via Email