Thursday, June 12, 2014

!! ఎప్పుడొస్తావో .....!!

రోజు ఒక్కసారైనా ఆకాశంలో చూస్తాను
ఏ మబ్బు తునకల్లో
నువ్వు దాగున్నావేమోనని ....

రావా ! ? ..... ఇప్పుడే రాలేవా ! ?
ఒహో ... సమయానికి ముందే
ఎలా రావాలని నీ సందిగ్దమేమో ...

చూడు నీకోసం ...
ప్రసవం తర్వాత తొలి సంతానాన్ని
గుండెలకెప్పుడు హత్తుకోవాలా అని
తపించే తల్లిలా .... అవని ఎదురు చూస్తుంది

సంవత్సరాలుగా దూరం ఉంటున్న
భర్త కోసం విరహంలో
జ్వలిస్తున్న భార్యలా ... వృక్షాలు ఎదురు చూస్తున్నాయి

కాగితపు పడవలు చేయడం
నేర్చుకున్న పసివాళ్లు
కళ్ళు మూసుకొని నువ్వు వస్తున్నవైపే సూటిగా
తన్మయత్వంగా చూడాలనుకుంటున్న ఎన్నో వదనాలు

నిన్ను ఒక్కసారి తీసుకొని
గాలిలో ఎగరేస్తూ
ఆడుకోవాలనుకున్న ఎన్నో దోసిళ్ళు ...

ఎవ్వరైన నవ్వుకుంటారనే
సంకోచాలన్నీ వదిలి
నృత్యం చేద్దామనుకొనే అందరూ వయస్కులు

ఇలా అందరూ నీకోసం నిరీక్షిస్తున్నారు ...
ఇక నేనా ...?
నేనూ ఎదురుచూస్తాను ...
నువ్వు వచ్చాకా కంటే ...
నీ రాకకు ముందు ఉండే లక్షణాలా కోసం ఎదురుచూస్తాను

రాకుమారి నగర వీధుల్లో వచ్చే సందర్భంలో
పరిసరాలు ఎంత ప్రశాంతంగా మారిపోతాయో
నీరాకకు ముందు వాతావరణంలో అలా ప్రశాంతత వచ్చేస్తుంది
గ్రీస్మం తన ఓటమిని అంగీకరిస్తూ తాపాన్ని తగ్గించు కుంటుంది
వెలుతురు తన తీక్షణత కోల్పోయి మసకబారుతుంది
నిండు గర్భిణిలోని పరిపూర్ణత మేఘాల్లో వచ్చేస్తుంది ....

ఆ అందాలన్నీ ఆస్వాదిస్తూ అంటాను
ఓ వర్షమా ...త్వరగా రావా ...
నీకోసం ఎదురుచూస్తున్న
అందరినీ నిలువెల్లా తడిపిపోవా .......

Posted by : mehdi ali 10:42 PM